مدونه خاصة بتعليم الكروشية | الكروشية التونسي | التريكو / المكرمية وبعض الحرف اليدوية
الأحد، 15 يناير 2023
NEW
التريكو
قبل ما اتعلم تريكو كنت افكر انوا صعب جدا بالذات الابرتين حاجة كدة كانت صعبة ازاي بياخدوا الغرز من الإبر دي مستحيلة بالنسبالي مش هعرف اتحكم فيها .... ولكن اي حاجة من الأفضل نجربها و بعد كدة نقرر صعبة أو سهلة هتكون مناسبة ليا ولا لأ ودا اللي عملتوا و قررت اتعلم التريكو وكانت المفاجأة اتعلمت التريكو و حبيتوا و كمان دخلتوا في شغل الكروشية التونسي و فعليا ياريت كنت اتعلمتوا من زمان
ودي بعض المشاريع دخلت فيه الكروشية التونسي مع التريكو
غرز التريكو كتيييير جدا ولكن اول ما بدأت اتعلمت اصفف البداية
أحد أصفف البداية في التريكو
و عرفت ايه الفرق ما بينهم و ليه الإختلاف في بدايات الاصفف وبعد كدة اتعلمت الغرزة العادية بالتريكو
والنهاردة هنتكلم عن بلوفر جميل جداً ويصلح لجميع الاعمار سادة آوي وشيك جدا ويصلح يكون حريمي ورجالي
بلوفر النهاردة هيكون بالغرزة العدلة دا شكل الغرزة
الغرزة دي من اساسيات الكروشية التونسي سادة آوي و شيك جداً وتصلح لوحدها زي ما هنشوفها في بلوفر النهاردة وتصلح تكون مع غرزة تانية او نستخدمها ضهر او أكمام ونكمل بغرزة تانية ... ليكي الأختيار وعلي حسب الذوق الشخصي
طبعاً عمل بلوفر بيكون مش بسيط آوي لبعض الناس بالذات لو مقاس كبيير .. والكلام المعهود انا مبتدئه دا صعب خليني في حاجة بسيطة بس احب اقولك دا مش صحيح وابسط حاجة خديها تحدي مع نفسك واشتغلي البلوفر ده واعملي حاجة بسيطة معاه في نفس الوقت .. بمعني كل ما تحسي بزهق ( وكلنا بيحصل معانا كدة ) انقلي علي القطعة البسيطة اللي بتشتغليها مع البلوفر ده
كلامنا النهاردة عن ابر الكروشية التونسي بأنواعها واستخداماتها
ابرة الكروشية التونسي إبرة بتكون شبه ابرة الكروشية العادية من حيث الشكل ولكنها أطول منها اما طريقة الاستخدام مختلفة شوية عن إبرة الكروشية العادية .. نقدر نقول ان نتائجها في الشغل بتكون زي التريكو حتي ان فيه غرز شبه غرزة التريكو بالضبط
طيب شكلها ايه الإبرة دي دا شكلها ⬇️
إبرة الكروشية التونسي
وطبعا فيه أشكال تانية .. اتعرفوا معايا علي كل شكل
و بستخدموا في إيه وشبه ايه في التريكو أو الكروشية العادي
الإبرة دي .. بتكون اكتر ابرة تقليدية في الكروشية التونسي تقريباً بنستخدمها في كل حاجة في التونسي
بنعمل منها البلوفرات والشال و البطانية و حتي الآيس كاب و طبعا فيه منها الخشب و الألومنيوم و حتي
الاستالس ستيل ،
إبر كروشية تونسي بأشكالها المختلفة
بس مثلاً لو حبيت اعمل آيس كاب دائري ( مقفول يعني ) ساعتها عندي الإبرة الدائرية ودا شكلها
إبرة كروشية تونسي دائرية
ودا بيكون اسموا كروشية تونسي ملون و نتيجتوا اهي
بتكون زي ما انتم شايفين في الصورة دي ليها اتنين خطاف واحد باخد بيه الخيط ع الإبرة و التاني بسحب منو
و بكدة بيكون الشغل معايا دائري أو《 ع المقفول 》
.. و لكن هل يا تري دي هيه الوظيفة للإبرة دي و بس خلاص أكيد لأ بنقدر ندخل ألوان في شغلنا بالإبرة دى 《 يعني بسحب الشغل بلون و بشتغل بلون تاني خالص زي كدة 》كمان فيه ابرة تانيه وبتقضي نفس الوظيفة الابرة دي اهي
كروشية تونسي ملون
كروشية تونسي ملون باستخدام الابرة الدائرية
فيه إبرة تانيه ليها نفس الإسم ولكن هيه عبارة عن إبرة و سلك بقدر اشتغل بيها نفس شغل اول ابرة اللي هيه دي و لكن ليها هدف تاني و هيه المقاسات الكبيرة و عمل البطانية و كمان عمل الأكمام لأني طبعاً لو حبيت اعمل بطانية مقاسها كبير صعب جدا اشتغلها بالابرة العادية ولذلك الإبرة الدائرية افضل 《 ايوا ام سلك دي 》و طبعاً فيه منها الرخيص زي الموجودة بنهاياتها
سلك بلاستيكي
ابرة كروشية تونسي دائرية بسلك
وفيه منها الغالي والأصلي ونهاياتها بها جزء معدني والاغلب بيكون نحاسي ودا بيربط فيها سلك حسب المقاس المحدد
ابرة دائرية في الكروشية التونسي
ابرة كروشية تونسي بسلك
و زي ما ليها مقاسات في الإبرة السلك كمان ليه مقاسات بيبدأ من ربع متر لحد 3 متر و يمكن اكتر و بستخدم السلك المناسب تبعاً للقطعة اللي شغاله عليها يعني حجم السلك في بلوفر أو لعمل الأكمام مش هيكون آد حجم سلك لعمل بطانية
ودا كان موضوع النهاردة سهل وبسيط
و نيجي للسؤال اللي دايما بتسألوني عليه هل الكروشية التونسي الملمس تبعوا زي التريكو 《 ودا السؤال 》
و الإجابة بسيطة جدا .. ملمس القطعة بيتحدد من رقم الإبرة اللي بنستخدمها و نوع الخيط ايه دا ليه ؟ لو مثلاً استخدمنا ابرة ضخمة مع خيط رفيع في غرزة زي الغرزة العدلة هيطلع النسيج معايا طري جدا وناعم زي التريكو يمكن قليل جداً اللي هيصدق إنو كروشية و العكس لو اخدنا خيط تخين و قللنا رقم الإبرة عن الموجود علي الليبل هيطلع معايا نسيج ناشف
و فيه غرزة في التونسي الإبرة بتغير شكلها تماما زي الغرزة الكلية إذا استخدمتي إبرة ضخمة الغرزة بقا ليها فتحات زي الكوفية دي ولو صغرتي الإبرة بيكون شكل النسيج متماسك و تقريباً بتشعري انها مش نفس الغرزة بسبب ان شكلها متماسك جدا .. و دلوقتي انتم احكموا بنفسكم هل يا تري شبه التريكو ولا لأ
دلوقتي هعرفكم علي شكل الإبرة التونسي و هيه شبه ايه في التريكو و الكروشية العادي 《 بالصور 》
اولاً التابستري هو فن إدخال ألوان مختلفة لرسم صورة او منظر ما
طيب أزاي بيتكون علي القطعة المقصودة ؟
ده اللي هتعرفوا النهاردة
التابستري بتختلف تسمياته من مشروع لآخر يعني هتلاقي ناس بتقول علية cross stitch ودي تسمية صحيحة ولكنها لا تعتبر تايبسترى لية ؟
لأن غرز الكروس أقرب للتطريز بتكون الغرزة شبة ال x وطبعاً مع اختلاف الألوان بيتكون الشكل ( كما هو موضح بالصورة )
باترون cross stitch مبسط
باترون cross stitch
cross stitch pattern
و زي ما انتم شايفين غرز الكروس في الباترونات السابقة ممكن يكون الباترون مبسط جداً زي الصورة الأولي وممكن يكون مركب شوية وممكن يكون صورة ضخمة وتنفيذها ياخد وقت كتيير ودا بيكون علي حسب تنسيقك الشخصي
يعني ممكن تاخدي باترون زي الباترون المبسط ده وتبتدي تنفذي بيه مشروع يكون ضخم بمعني انك تعيدي الباترون كذا مرة اثناء الشغل او تستخدمي كذا باترون مع بعض .. ودا بينطبق علي التابستري أيضاً
حاجة كمان لازم نعرفها ان التايبستري شغله بيكون عباره عن باترون وبنمشي حسب الباترون ده .. وطبعا ممكن انتي تعملي الباترون ده وتبتدي تشتغلي علية .. بس لازم يكون الورقة اللي هتنفذي عليها المشروع تكون مربعات سواء الباترون اللي هتنفذية تابستري او cross stitch
شكل يوضح أساس باترون التابستري قبل الرسم عليه
أما الباترون و شكل الباترون ( موضح أدناه )
بيكون علي حسب الرسمة و طبعاً فيه منها البسيط والمركب
باترون تابستري
باترون تابستري
وزي ما انتم شايفين الباترون فيه خطوط عرض وطول ودا بيكون عدد الغرز المرسوم عليها الباترون و طبعاً عدد الغرز بالعرض والطول ودا لازم تعرفيه بالذات لو حابه تكبري الباترون ده كمقاس او تعيدي الباترون كذا مره اثناء الشغل ( زي شغل البلوفرات و البطانية و غيرها بنحتاج احيانا تكون الرسمه معاده كذا مره )
باترون تابستري و يصلح يكون cross stitch
وطبعا هنتكلم عن ازاي نقرأ باترون التايبستري في مواضيع آخري
التايبستري بينقسم لنوعين
تايبسترى بالكروشية العادي
و تابسترى بالكروشية التونسي ودا هيكون موضوعنا النهاردة
تقدري تشتغلي التايبستري بالكروشية التونسي بغرز وتنشئة كثيرة ولكن سنذكر منهم اتنين فقط وهما
طبعاً فيه غرز تانية ولكن الغرزتين البسيطة والعدالة هما اشهر الغرز مع التايبستري التونسي وبيكونوا متماسكين جداً ومميزين
ولكن اشعر ان الغرزة البسيطة أحيانا بتغطي علي الشكل .. ولكن مع بعض الألوان
تابستري تونسي بالغرزة العدلة
بداية شغل التابستري بيكون بناء علي باترون ولكن من الأفضل دائماً نشتغل حوالي اربع اصفف او اكتر لو كان الباترون في المنتصف او علي الجانب لضمان بروز الشكل ( زي ما انتم شايفين في الصورة السابقة لو اشتغلت الباترون بعيد عن الحافه كان هيكون افضل بكتير في الشكل و اسهل في التنفيذ )
كمان تقدري تشتغلي الباترون من بداية العمل بالذات اذا كان حجم الباترون كبير او تريدين الباترون فقط بدون اي ذيادات .. وتقدري تزودي في عدد الغرز من الجوانب لضمان ان يكون الباترون في المنتصف
كمان بنقدر نشكل اي باترون علي مزاجنا ازاي؟ ممكن جدا تاخدي وردة او صورة ما وتبتدي تشتغليها بالكروشية التونسي وتكون في المنصف او الجانب كما تريدين
شنطة بالكروشية العادي
تابستري بالكروشية التونسي ( غرزة عدلة )
وبنقدر نشتغل التايبستري بالكروشية التونسي علي اي حاجة زي سجادة قطعة ملابس آيس كاب ، بلوفر او شال ، خدادية كما هو موضح بالصورة شنطة ... أشكال لا حصر لها
وبعض الاشكال دي اشتغلناها بالتابستري التونسي مع الفيديوهات
وكلامنا النهاردة إستكمال لغرزة الضفيرة البسيطة ولكن المره دي بالشكل الحريمي او التأثير الحريمي أزاي ؟ .. ده اللي هنعرفوا النهاردة ......... السلام عليكم اتمني لكم يوم جميل
طيب ايه اللي بيفرق الغرزة دي عن غرز الضفيرة السابقة سواء بشكل عادي او رجالي .. ايه اللي بيخليها حريمي
غرزة الضفيرة بالشكل الحريمي
كيفية تنفيذ غرزتنا
الغرزة المقلوبة
ببساطة كدة الغرزة المقلوبة هيه اللي بتخليها حريمي يعني غرزتنا دي لا تصلح رجالي ؟ اه فعلاً لا تصلح رجالي أزاي واحنا في المواضيع السابقة قلنا انها بتكون قبل الغرزة مباشرة ......... تمام قبل الغرزة ولكن كمان كان فيه أعمدة ودي كانت غرزة الضفيرة بالشكل الرجالي ( يعني بدون الأعمدة الموجودة في الشكل الرجالي لا تصلح تكون رجالي ودا موضوع النهاردة
غرزة الضفيرة بالتأثير الرجالي
أعدداها مش صعبة او مركبة أبداً كل اللي عليكي إنك بتحددي عدد محدد للغرزة المقلوبة وليكن 5 وعدد محدد لغرزة الضفيرة وليكن 8 وبتفضلي ماشية علي الأعداد دي 5 للغرزة المقلوبة و 8 للضفيرة 5 للغرزة المقلوبة و 8 للضفي....وهكذا وصولاً للمقاس المطلوب
غرزة الضفيرة بالشكل الحريمي
مثال تاني لتوضيح الغرزة
بكل بساطة الأعداد مش مشكلة المرة دي اسهل حاجة حددي انتي عاوزة كام ضفيرة وليكن 3 ضفائر والضفيرة هتكون مثلا من 12 غرزة وقبلها مثلاً 5 مقلوب من كل جانب وبس خلاص فيه اسهل من كده
طيب ممكن اعمل ايه بالغرزة دي ؟
نقدر نعمل كتييير جدا بالغرزة دي
هنذكر منها البعض
غرزة الضفيرة بالتأثير الحريمي
طبعاً البطانية ومين مش نفسوا يعمل بطانية ضفاير .. البطانية الضفائر حاجة كدة مختلفة وسيك جداً بتضيف لأي مكان تتوضع فيه وطبعاً الملابس الرجالي ( بغرزة الضفيرة بتأثيرها الرجالي ) شيك جداً والكوفيات الرجالي ( عملنا منها واحدة دوسي علي اللينك ) والملابس الحريمي ودي كتيير جداً نذكر منها الشال والكوفية والآيس كاب وغيرها كتير من كارديجان وبلوفرات ...... الخ وكمان تقدري تدخليها كغرزة تانية في اي حاجة
النهاردة هنتكلم عن كوفية في قمة الروعة تصلح تكون رجالي أو حريمي شيك جداً واستخداماتها كتير تصلح شال او كوفية بالنسبة للسيدات .. بالنسبة للرجال كوفية ضخمة .. وطبعاً تقدري تصغري حجمها علي حسب عدد الضفائر والأعمدة اللي هتحدديها
غرزة الضفيرة البسيطة من أجمل الغرز في الكروشية التونسي .. نقدر نقول انها غرزة سهلة طبعاً كتير بيحس انو صعب يشتغل ضفائر وانها غير مخصصة للمبتدئين ولكن خلينا نكسر القاعدة دي تماماً وأقولك ان مفيش حاجة صعبة او مستحيلة طالما بنحاول فيها ومع التمرين بتتكون المهارة والأتقان
ايه هيه غرزة الضفيرة المعتمدة في الكوفية دي هيه نفسها غرزة الضفيرة البسيطة ولكن بإضافة بعض الأعمدة من الغرزة العدلة بقت رجالي .. وطبعاً تصلح حريمي لأننا بنشاركهم في حاجات كتيير ولكنهم ما يقدروش يشاركونا في حاجات كتير
أستخدمت كذا غرزة لعمل الكوفية دي وهما الغرزة العدلة ( للأعمدة الموجودة في الشكل ولعمل الضفائر ) و الغرزة المقلوبة ( ودي كانت فوارق ما بين الضفائر والأعمدة .. ولتوضيح شكل الضفيرة بشكل أفضل )
ولو حسبناها كده وجمعنا كل اللي أخدناه هبقي بكدة استخدمت غرزة الأستك التونسي و الغرزة العدلة ( بشكل ملخص أكتر )
كوفية ضفائر حريمي
طريقة تقسيمة الكوفية دي .. شرحتها معاكم في الفيدو بالتفصيل .. عشان تقدري تخططي الكوفية دي بأي شكل تحبيه ولو حبيتي تكبري الشكل تكوني فاهمة ازاي بيكبر ( لأن نفس الشكل ممكن نعمل بيه بطانية مثلاً ) ولو حبيتي تصغري الحجم عن كوفيتنا النهاردة تقدري تعملي كده
بداية الكوفية ٧١ سلسلة
ودلوقتي التقسيمة كاملة وبالتفصيل من بداية الكوفية لآخرها من أضلاع وضفائر وغرز مقلوبة ...
البداية 5 غرزة عدلة
2 مقلوب
8 للضفيرة (غرزة عدلة)
2 غرزة مقلوبة
4 غرزة عدلة
2 غرزة مقلوبة
8 للضفيرة (غرزة عدلة )
2 غرزة مقلوبة فواصل فقط
4 غرزة عدلة ( الأعمدة للشكل فقط )
2 غرزة مقلوبة
شكل يوضح غرزة الضفيرة عن قرب
8 غرزة عدلة للضفيرة
2 غرزة مقلوبة
4 غرزة عدلة
2 غرزة مقلوبة
8 للضفيرة ( غرزة عدلة )
2 غرزة مقلوبة
5 غرزة عدلة ( الختام )
طبعاً الشكل ده مش بيتكون لحالوا كدة او ليه قاعدة ثابته ولكن علي حسب عدد الأعمده ( للشكل فقط ) بالغرزة العدلة وعدد الضفائر والغرز المقلوبة بيتكون الشكل .. احسبها أزاي ؟؟؟
بكل بساطة طريقة حسابها كالآتي : بتحددي عدد الضفائر اللي عندك في الشكل ولنفترض مثلاً انهم 5 ضفائر كل ضفيرة منهم 8 سلاسل
بالطبع كده هيكون عندك قبلها غرز مقلوبة وبعدها غرز مقلوبة ( قبل وبعد الضفيرة ) وفي المنتصف ما بينهم هتكون الأعمدة
الغرزة العدلة ( اللي بتكوني برضوا حددتي عددها هيكون كام سلسلة في العمود الواحد ) ممكن يكون ٧ سلاسل في كل عمود
وبتبدأي تنظمي المسألة علي الأساس ده وهتبتدي تحسبي 5 ضفائر الواحدة منهم فيها 8 سلاسل هيكون معاكي 40 سلسلة دا بس الضفائر وهتجمعي عليهم عدد الغرز المقلوبة وأوعي تنسي ان الغرز المقلوبه لازم تكون قبل الضفيرة وبعدها وتجمعي كمان عدد الأعمده في الغرزة العدلة وبكده هيطلع معاكي العدد الخاص بسلاسل البداية مهما كان الشكل اللي انتي عاوزاه مختلف او كبير أو صغير هيكون بسيط جداً عليكي ( أهم حاجة ورقة وقلم وابدأي احسبي ) وبعد صف البدايه ابدى في شكل كوفيتك واتأكدي انك ماشية صح دايماً الأخطاء بتظهر في المرحلة دي
وبعد كل التفاصيل دي .. عملت معايا الكوفية حوالي 45cm / 46cm ودا عرض مش قليل ولكن لو هتكون الكوفية دي
حريمي فيه ناس بتحبها اعرض من كده وخصوصاً لو كانت شال .. أكيد هتكون أعرض ولذلك تقدري تكتري عن الأعداد دي (أعمده وغرز مقلوبة وغرزضفيرة ) وبالطبع كده هتكون أعرض بكتير سواء نظمتيها انها تكون كوفية او شال او حتي بطانية كده هتكون بالحجم اللي تحبيه
أزاي بيتم شكل الضفيرة من الأساس ؟
شكل بيوضح كيف يتم أختلاف الغرز
غرزة الضفيرة هيه غرزة ببساطة كده بتقسمي عدد السلاسل تبعها بالنص جزء منها بيرجع للخلف والجزء الثاني بيتم سحبة والجزء اللي تم ارجاعه للخلف بيوضع مره آخري علي الابرة ويتم سحبة ( وبكده بيكون حصل معاكي اختلاف غرز بسيط ودا المسئول عن شكل الغرزة فيما بعد )
بعد ما بيتم الاختلاف ده بنرتفع عدد 8 أصفف ( ممكن تقل عن 8 أصفف وليكن 6 أصفف وممكن تزيد عن 8 أصفف وليكن 10 أو 20 صف ) علي حسب الموديل والشكل اللي هتحدديه
أستخدمت نوع خيط اليزا بيركيوم .. النوع دا غير مفضل بالنسبة للبعض
ولذلك تقدري تستخدمي قرطبة او هيمالايا ( هترك لكم صور بالنهاية )
طريقة التقفيل والتشطيب في كوفيتنا كانت بعدة طرق
أول طريقة كانت بالغرزة العدلة
ثاني طريقة كانت بالمنزلقة
ثالث طريقة كانت تدعيم الأطراف ( لو كانت بتلف او رول معاكي )
رابع طريقة والأخيرة تدعيم بالطول لمنع الكوفيه انها تمط في الطول بزياده )
ملخص :
اسم المشروع: كوفية ضفائر بالكروشية التونسي
نوع الشغل : كروشية تونسي
اسم الغرزة: غرزة الضفيرة البسيطة بالشكل الرجالي
نوع الخيط : اليزا بيركيوم الخيط 100 جرام 210 متر
اللون المستخدم رمادي رقم اللون ( موجود بالصور )
( البداية: 71 سلسلة ( طريقة التقسيم الموجودة في الكوفية ذكرت من قبل )
العرض : 45cm
الطول حوالي 2 متر و 20سم
